MAIRIEPROJETSVIE LOCALECADASTREVOS QUESTIONS



300px-riventosa-village.jpg mer3.jpg riventosa2.jpg bkg_181722_1745720.jpg img_2833.jpg p1010046.jpg la rue du four.jpg p30-04-09_112902.jpg cafe 2.jpg

Poésies de Mattea Casanova:

lelia


L’ochji spalancati
Ti feghja è li scappa
Un surrisu scherzosu

Si dumanda perchè
Issu vechju capigrisgiu
A feghja à bocca aparta

Mi vulerà manghjà ?
Serà cusì famitu ?
Si dumanda insischita
A zitelluccia ardita

Ma tutta st’ ingurdizia
Un hè chè tenerezza !

Si stampa u to ritrattu
In fondu à lu so core
U to caru babbone

Quì face u venachese
Ma forse chi in Ajacciu
Serà un missiau curtese

Chì furtuna o Lè
Di sente intornu à tè
L’amore è l’allegrezza

  O Principessa !
 
Algeria


Vintisette anni avia
E dritta era a so via
Bramava di ritruvà
A so terra nativa

Ma a sorte assassina
Un l’hà vulsuta

Cridia di difende
A Francia è a ghjustizia
In se Terre surelle
Di u Mediterraneu
Burlatu da un statu
Falzu è culunialistu

Hè sparitu pè sempre
Quel ghjornu in Algeria
Cusì caru u mio ziu

Raffalli Ghjiseppu Maria
 

Venacu di Lugliu in u 2003
A  Babbu



Un canta più l’omu di core
U pueta pastore
Un canta più l’omu d’onore
Si nasce è po si more

Un canta più u machjaghjolu
Scappatu da l’infernu
Di su putere indegnu
Chi suminava dolu

Un canta più nantu à sta terra
Hè notte già sopra à le cime
Si n’hè andatu quella sera
D’ottobre di su neru vaghjime

Un canta più
U sentu sempre.
      A un cantante

           A canti tù
           A terra cara
           Chi ci dà vita
           Senza cuntà

           Ci campu eu
           Da cime à piana
           In a mio tana

           A canti tù
           L'ora vera
           Dopu à u frombu
           Di a scena

           A campu eu
           Da notte à ghjornu
           Tra vita é sognu

           A canti tù
           A sulitudine
           In a vittura
           Chì si ne va

           A campu eu
           In u silenziu
           Di sole è ventu

           A canti tù
           A campu eu
           A vita cumu ella hè
                        
                         Venacu 1988
 
Acqua

L’acqua curria
Nantu à u vetru cutratu
Acqua marina
Da u ventu
Spulata

L’acqua curria
Nantu à u visu calatu
Acqua salita
D’una lacrima
Persa

U celu è a terra
Mischiavanu e so lacrime
Fondu à l’ochji turchini
Di quella chi pienghjia
Arrabbiata

Venacu, lugliu di 1985
     Alba

A notte affanosa
More in u primu raggiu di sole
Chi spunta
Sottu à u vechju purtellu .
Aspettu sempre issu raggiu
Chi disciterà a sumentula
Piatta, piatta
In a mimoria di l’ omu
Amutulitu .

         Venacu, lugliu 1977
      Atteppati

Ùn ai mai betu
A e surgente cudrate
Ùn ai mai vistu
Fiori maraviglia
Appesi à i scogli lisci
Acelli libertà
Sopra à l’aghje luntane ?
Allora atteppati .
Atteppati !
Chi ghjè ora
È scopri e to muntagne .                                      
         Venacu, 1 aostu 1977
A Stella Chi Fughjia

Aghju vistu una stella
Una stella chi fughjia
U mondu durmia
E nimu a vidia

Nantu à a rena insunulita
A stella si hè calata
Un zitellu curria
E mani tese versu a luce

Statti qui
U ghjornu ti piatteraghju
A notte anderemu inseme
Pè i paesi luntani
Un possu micca
U zitellu pienghjia
Un possu micca
U mondu hè pienu di gabbie
E mi chjamu LIBERTA!


Mattea Casanova (aostu
1977)
     Briacu

Briacu issu battellu
Chì voca
Nantu à l’onda ?

Hà strappatu a catena
E fughje cume un scemu
Di sciume infrisgiulatu

U mare l’accarrezza
L’acelli u circondanu
A sera un ventulellu
Annana e so vele

Battellucciu briacu
Pianta quì una cria
E facci sente u soffiu
Di issu pueta persu
In li fiumi luntani

Circava u so mare
Per lampà ci un battellu
      Leggeru
Cume una farfalla
      Veraninca    
     
Venacu, ghjugnu 
2002

 
      Chjosi

Chjosi
I rughjoni
Di i novi pastori
Chjosi
I purtelli
Di e nostre case
Chjosi
L’ochji
Di i testimoni
Chjose
E labbre
Di quelli chì sanu
Chjose
L’arechje
Di quellu ch’ùn vole sente
Chjosi
I cori
Di l’omi d’oghje
Spalancate
E bocche spaventose
Spalancatu
L’usciu di u sprufondu
Cechi, muti è cionchi
Andemu puru à capulà.
                  
 
     Discetati

Nantu à un ghjambone seccu
Di u vechju chjarasgiu
Rachja
Una curnachja

In celu grisgiu
Sopra à un pullinaghju
Abbandunatu
Gira un filanciu

Nantu à e chjappelle fruste
Di a nostra stretta
Galoppa
Un cavallu scemu

Hé spupulatu stu paese?
Ùn si sente un alitu

Discetati o amicu
Era un gattivu sognu
Senti chi ghjocanu i zitelli
Senti u frombu di e vitture
Senti chì parlanu francese

Hè vivu u to paese !
      Era

Era una giuvanotta
È vulia campà
Avia sceltu a terra
Di u so benistà
Era una giuvanotta
È vulia campà
Cù li nostri figlioli
Bramendu a libertà

Libertà di mustrà
U so visu à tutti
Libertà di sceglie
U so innamuratu

Era una giuvanotta
Bella è piena di vita
U babbu l’hà pigliatu
Ciò ch’ellu avia datu

Era una giuvanotta
È vulia campà
Oghje pienghje una mamma
È sbuccia la rivolta
Nimu pò capì
Nimu pò perdunà
A s’hà pigliata l’oscurità

Ma cumu si chjamava
Oghje più nimu la sà
Era una giuvanotta
Chì vulia campà
U babbu l’hà pigliatu
Ciò ch’ellu avia datu
U so stilettu scemu
L’hà tagliatu lu fiatu

Ma cumu si chjamava
Oghje più nimu la sà
Ella ùn avia anima
Per ellu era figliola,
Surella,
Ma donna mai.

 
     Estru

Quand’ellu mi piglia
L’estru,
Ciottu a penna
Indù l’inchjostru.

Senza pena, corre
È frisgia
A pagina bianca.

Ma strampalata sò
È rivoccu u calamaiu.

Corciu fogliu di carta
Chì si zurpa
L’amarore torbidu

Di l’incertu !

       Venacu,lugliu di u 2002
     Induve si

Si sò chjosi per sempre
I to ochji turchini
Hè sparitu dinò
U surrisu scherzosu
Di e to labbre care
Fatte à lu pinnellu

Si n’hè andata oghje
A mulattera fiera
A muntagnola lesta
Chì cantava a matina
Per salutà u sole
Di a so voce latina

Si n’hè andata sola
Ùn ci a micca aspettatu
Oghje u mio core hè strintu
Oghje un ci hè pi u chè dolu
Perchè tantu penseru
Dopu à tante suffranze ?

Aspettu sempre un segnu
Un soffiu,una carezza
Induve sì o mà ?

Venacu u 13 di ghjugnu      2003
    Sciugliture

Sciolta
Lingua sciolta
Lingua nostra
Senza pastoghje
Libera
Passa è vene
Trà noi
Corre, ricucca
Azzizza
Sussura, azzeca
Rinquiere

Sciolti
Capelli sciolti
Senza frisgetti
Ne cappii sturzozi
Liberi
Spulati sventulati
Correnu
Passanu è venenu
Davanti à l’ochji

Sciolti
I straglieri
Di li to scarpi
Pisii
Sciolti
I nodi in gola
Sciolte
E catene
Di a storia arrubbata

Corri
Scalzu
Nantu à a rena
Legeru, alutu
Corri, corri
Chì nimu ti para
È porta la luntanu
A parolla  nustrale
Canta, canta
Chì eu ti sentu.
 
     Muntagne

Apru lu mio purtellu
è vi vecu
Luntane è vicine
Mi date u vostru fiatu
A vostra forza .
Un filanciu gira
è fisca .
U sole si spechja
in e so piume d’oru .
Salute à tè
Acellu vivu
Acellu liberu
Di e nostre muntagne .

               Venacu 27/06/00
     Paese

Sò d’ un paese chi ci lampa
Muschi prufondi di a machja

Sò d’un paese chì ci spula
Culori vivi di a terra

Sò d’un paese chì ci canta
Nanne è paghjelle a più pudè

Sò d’un paese chì rispetta
D’ogni zitellu a libertà

Sò d’un paese chì s’atteppa
Versu e cime induve saltanu e muvre

Sò d’un paese insunnulitu
À l’orlu d’un mare sempre turchinu

Sò d’un paese induve gira
Sopra à l’aghja tamantu filanciu

Sò d’un paese di speranza
Chì cerca a strada di l’avvene

U to paese hè u meiu
U mio paese hè u toiu

U meiu, u toiu, u nostru
Hè u nostru paese
    
Induve hè issu paese di maraviglia ?
In li to ochji, in lu mio core

U meiu, u toiu, u nostru
Hè u nostru paese
 
     Solitudine


Tù sì eu
Eu sò tù
Sottu à un celu
Lucicante
Ci canta un pueta
Tù sì eu
Eu sò tù
Sò tuttu
Per tè
Per tene
A to manu
À due mani
Dumane
Tù sì eu
Eu sò tù
Solu
Sò lu to sole
Per tè sola
Soli eu è tu
Solitudine
       Sonniu

L’averaghju suniate
Cusì beate
Isse stonde fatate
Incù tè ?

M’ avii fattu crede
Chè tù tenii in core
E parolle sincere
Di l’amicu Prevert

L’avia suniata
Cusì sebiata
Issa vita campata
Incù tè

Ch’o era a to lumera
A mi dicii à spessu
Chì di Ghjacumu Santu
Arrubasti lu versu

Perchè sapii tù
Quantu ella mi piacia
Di issu maestru corsu
A puesia.

L’avia suniata
Mai un l’aghju campata
Issa vita sebiata
Incù tè

L’ai traditu u sonniu
Ai sceltu di fughje
E di corre luntanu
A bughju

Chì s’era spentu
In tè
U luminellu.

           Venacu, ottobre 2002
 
     Veranu

sò ghjunte e rundinelle
A  zuricà e tittelle
Sò ghjunte e rundinelle
Femu puru e frittelle

Hè nata una farfalla
È si mette à ballà
Hè nata una farfalla
Un fiore hà da sbuccià

S’ hè mossu un ventulellu
Trineca u mio purtellu
S’hè mossu un ventulellu
Vole entre un acellu

Ci porta una nutizia
Hè  finitu l’inguernu
Ci porta una nutizia
Oghje splende u veranu

Entri puru ò cumpà
Porta ci l’allegria
Entri puru ò cumpà
À cantà una cria

          Venacu, aprile 2003
    Ventu

Ride u ventu
Chì ci lampa
Granella aluta è graziosa
Di u pinu altu è fieru
       E ridenu i  toochji     

Fischia u ventu
Chì si campa
Sopra à i sciappali dritti è bianchi
Di neve marzulina
       E fischianu e to labbre

Mughja u ventu
Chì porta fiara è fume
Da l’arburu cascatu
À quellu chì hà da more
      È si stringhje u to core
     Zitellu

Sò un zitellu
Chì salta è ghjoca
È pensu à quellu
Ch’un pò marchjà

Sò un zitellu
Più chè tratechju
È pensu à quellu
Ch’un pò manghjà

Sò un zitellu
Di cantu saziu
È pensu à quellu
Ch ‘un pò parlà

Sò un zitellu
Senza pastoghje
È pensu à quellu
Ch’un pò scappà

Sò un zitellu
Riccu di vita
È pensu à quellu
Ch’ un pò campà

Perchè eu
È micca elli, ?
 
     Tante parolle

Tante parolle chì pichjanu
À l’orlu di a memoria

Tante parolle chì sbuccianu
Cume fiori di mente

Tante parolle chì battenu
In core d’omi bravi e di donne valente

Tante parolle chì zirlanu
In l’ochji di issa ghjente

Tante parolle
Chì ùn seranu mai dette
Tante parolle
Chì brusgianu e labbre
È si fermanu spente.
    Talavucciu

Talavucciu o talavellu
Fior di veranu
Candilellu o luminellu
D’amore vanu

Sempre  lampi i to muschi
È disceti  i demonii
Allupiati  in i mio sogni
Da chè tù fischi
     Tilaghju

Fila raggi di sole
E  tesse
Surrisi zitellini
Fila, fila u tempu
Accendite furiose
In celu di statina
Chjarore di l’amore
Di prima ghjuventù
Fila è tesse
Tesse rete di fume
Di strazi è di penseri
Micca veli leggeri
Di fiori riccamati
Ma tela di lenzolu
Chi ti piatta la luce
Tesse sperenza è doli
Tesse corse suprane
E ciuffate marine
E po vene la notte
Si sbucina u filu
Di a trama urdita
U tempu di pensà
Quale hè u tilaghju ?
E strappa la catena
U tempu TESSE
Un TEMPU d’ESSE.
     UTOPIA

Perchè
Ogni notte
Pienghji
U sognu di stu populu
Libertà
Unità

Corsica
Onesta
Ribella
Sempre
Unica

Perchè
Ogni notte
Pienghji
U sognu traditu
L’illusione tamanta
Ultima speranza

Chì disgrazia
Oghje sparisce
Rapita da i corbi
Cume me
Isula surella
UTOPIA
     Umani

Umani
L’omi d’oghje ?

Ogni mane
A mi dumandu
Quandu sentu
Tantu spaventu :
A guerra chì mai si stanca,
A fame chì rode l’anima
Di tanta ghjente,
L’oscurità in a mente
Di quellu chì tomba
A nome di Diu.

Umani
L’omi d’oghje ?

Una voce luntana
Si pesa pianu pianu.
Sentu cantà a speranza
Una donna  s’avanza.
Forse un segnu
Per dumane.

Allora,
Umani l’omi di dumane ?

S’ella fussi
Chè no  ci porghjimu
Le mani !
         7 d’aostu di u 2002

                                                           


U PASTORE PUETA



 Tempu natu, serà cascatu in un paghjolu di latte? Chì Marcu Auleriu, hà sempre avutu una passione: u pasturismu.
Era un zitellucciu chì campava in un paisolu muntagnolu di u cantone venachese. Figliulinu di Marcone, pastore niulincu, Marcu Auleriu passava e so stonde di libertà à cuttighjà e sciocche di  Ziu  Antone chì pascianu in i rughjoni vicini di a Curnachjola. Si stendia à u sole è merezava incù e capre chì rumiavanu. Fighjava girà un filanciu è fiscava, aspettendu una risposta. Li si paria d’esse u rè di u mondu.
Un ghjornu, à l’età di dice è sette anni, scuprì un beccu chì rendia l’anima stesu à u pede d’una leccia.
L’agunia di l’animale l’hà cusi cumossi ch’ellu l’hà supitu fattu una puesia :

Eu so beccu, natu per la campagna
D’un antru beccu è d’una capra orfagna
Cun poche uvere piene da pudè fà sughje è manghja..

Piantemu quì chì a canzona conta parechje strufate.

L’anni passanu, è po li tocca à parte in San Fiurenzu per fa u serviziu militare in u 173.
L’armata li piace pocu è cumpone una canzona, Lettera à Michele, induve ellu conta tutti i « piacè » di à vita di u suldatu. Piu tardi, si trova cunfruntadu à a seconda guerra mundiale. Priggiuneru in se terre luntane, pensa à a Riventosa è nasce un’antra canzona: Priggiuneru in 40.
Su primu d’aprile 42, innò ch’ ùn hè micca una burla, Marcu ritrova u so paese. Dopu à tanti mesi di vita arrubata, u priggiuneru scappatu, l’omu liberu decide chì mai più ùn francherà e limite di a so isula,ancù s’ellu ci vole à piglià a machja.
È issa prumessa, fatta à se stessu l’hà tenuta. Pastore vole esse, pastore serà ! Tandu, ùn si sà si a so vita serà quella d’un pastore / pueta o pueta / pastore.
Marcu Auleriu, incù i so fratelli, fecia legne, travagliava l’ orte, a vigna, ma u so scopu secretu era di buscassi una ruchjata di capre. Un ghjornu, affaccò allegru è fieru incù una decina di curnute ch’ellu avia compru a un capraghju sanpetracciu. Ùn eranu micca giovane giovane ma Marcu pensava allevà i capretti è pianu pianu, fassi una banda nova. Ma a sorte un l’ hà vulsuta. E capre tocche da l’ ochjucula, si so ortite e i so sogni dinò.
I mezi sò puchissimi è Marcu si face imprestà da un parente i soldi chì li mancanu.
Ecculu torna incù l’animali à barba, l’inguernu in pieghja è l’estate in la Curbaghja. A vita li face un antru rigalu : Maria . Maria, sgaltra è travagliusca serà sempre à fiancu à ellu. Si spartenu e faccende è tuttu pare cusì faciule ch’ elle sbuccianu parolle di speranza : « U pastore sepiatu »
                        
                 Chì vita santa
                 Quella d’un pasturellu
                 Chì balla è canta
                               Cù pecura è agnellu
                 Colmu più che di salute
                 Da i scarpi à u cappellu...

Marcu traduce in canzone tutti l’evenimenti di u so campà.

Marcu è Maria passanu u so tempu à travaglià ma sanu dinò prezià i mumenti di festa, u cinema, u teatru, u circulu.
Anu una zitelluccia è spartenu incù ella issa vita felice.
Ma, una volta di più, i malanni sò ghjunti à corri corri. Una frebba chi si sparghje in tutta a pieghja face disguasti tremendi. Marcu perde una parte maiò di a so banda è si ne scappa in paese pè salvà cio chi li ferma. « U pastore disgraziatu » rende contu di tutti issi strazii.

O quant’ ell’ hè mischinella
A vita di li pastori,
A passeranu più bella
I ricchi è li signori,
Ma la ghjente crede sempre
Chi, per elli, sianu fiori.

A vendita di u latte, di u casgiu è di u brocciu ùn basta per mantene una famiglia. Marcu face l’orte è travaglia à ghjurnata : lavora, vanga, zappa, face legne pè u mezu è a sera, stancu mortu, s’addurmenta cuntendu fole à a so figliola.
Ùn so micca fiori tutti i ghjorni ma si campa senza mai pate fame o fretu.
L’anni passanu. A famiglia si rallegra, chi hè nata una altra ciucca. Ma tutta issa gioia si spenghje prestu : Marcu perde a vista è a salute .
L’annate nere si seguitanu, ci vole à staccassi di a banda di capre.
Marcu ùn anderà più à corre a so muntagna ma sempre a canterà.

Ùn era micca un allevatore
Era un pastore
Impastu d’ore di libertà
Impastu d’oru di puesia.

 

Omagiu à Mattea di Maddalena Massiani,

A Mattea


O Mattè, la to risata

Mai più ùn si senterà.

Ma ùn pò esse scurdata,

Piatta in li cori sterà,

Risurgendu di più bella

In bocca d'una zitella.


Ne hai ingrandatu tantu

Figlioli di tutte e mamme,

Cùn un travagliu tamantu

E sole è uniche brame :

Fanne omi assennati,

Di e cavezze liberati.


A to più grande primura

Era di sparghje sapienza

Per francassi di a bughjura

E di a brutta intulerenza.

Mantenutu hai in stu filu

Lu to fiatu sempre vivu.


A scola di li pastori,

Di rigiru è di saviezza,

E quella di i stitutori,

A la surgente listessa,

Eranu li to puntelli,

I to spechji li più belli.


Degna figliola di Marcu

Pasturellu è pueta

D'estru nustrale impastatu

E di manera discreta,

Ti lasciò cù a so forza

Passione è lingua Corsa.


"So maestra clandestina!"

Tù dicìa spiritosa,

Cù a to risa cristallina,

Quandi la legge imperiosa

Un ti vulìa lascià

A to lingua tramandà.

 

Ma lu to sguardu turchinu,

Fieru,è u to sapè fà,

U to spiritu più finu

Chè tutti li "ricusà"

Anu avutu la suprana

Di la so putenza vana.


Dopu avè tantu straziatu

Cù curaggiu è dignità,

In fine di lu viaghju

Pace ti vogliu pregà :

Si un paradisu ci hè,

Piazza una,ci hè per tè;


Maddalena Massiani,

U 21Maghjiu 2010







                    












             








 





 

 
Nous contacter - Réalisation du site