MAIRIEPROJETSVIE LOCALECADASTREVOS QUESTIONS



bkg_181722_1745720.jpg img_2833.jpg 300px-riventosa-village.jpg riventosa2.jpg mer3.jpg la rue du four.jpg p30-04-09_112902.jpg p1010046.jpg cafe 2.jpg

Poèmes de Paul-André Fluixa
 

A morte di u mio ricciu

Si n’hé mortu lu mo ricciu
Chi ghjera carcu à puci
Si n’hé mortu primaticciu
Senza ch’ellu n’ebbe à nuce
Un lu tumbò di pallina
Chi morse di tratichjina !

Si n’hé mortu u mio ricciu
Un si pudia accarezzà
Rinchjosu  nu u so ghicciu
Ellu ùn sapia che zingà.
Crepò cume una fasgiola
Un meritava che piola !

Si n’hé mortu u mio ricciu
Era bugiardu di natura
Per tuttu fece capricciu
Ré di l’intrappulatura
U mio ricciu si n’hé mortu
Era chjucu é collistortu !

Si n’hé mortu u mio ricciu
Nimu ùn lu pudia pate
Di carrateru aspricciu
Si valia e ruchjettate
D’inguernu inlla freddura
Si n’hé mortu, crepatura !

U mio ricciu hé crepatu
Un n’avia mai abbastanza,
Sarko, ellu era chjamatu
Solu per a sumiglianza
Hé mortu, ne so cuntentu
Ch’ellu morga u presidente !

Paul-André
estate 2008
…à Ghjuvan Petru
(premiu di u libru corsu 2004)

Quandu a rima intreccia
I pedi d’ogni filare
A to musa capareccia
Ci ammenta stonduccie rare
Dà a Croce à u Pentone,
Di u Corsu, u Castagnone

Quandu a rima preziosa
Canta e petre di a storia
A puesia,  famosa
Face corre a memoria
Soga era u destinu
Di Ziu Petru u figliulinu

Quandu a rima s’atteppa
Per sbuccàne in e Mezane
Incù té, omu s’inceppa
Un pocu inde e Carlane,
Ci face gode lu frescu
Ghjuvan Petru di Francescu

Quandu chi a rima corre
Per i chjassi zitelleschi
É ch’ella canta l’amore
Sottu à purtelli mureschi
Tù sai cumu ci ‘ole à dì,
O Ghjuvan Petru di Mimì

Quandu chi  a rima azzizza
Ghjunghjiticcii, cose nove
A capimu a to stizza
E à tutti ci cummove,
Chi sì  di spiritu acùtu
Ghjuvan Petru u barbutu

Quandu chi a rima affuna
A a fibbia di a tradizione
U fà, l’infà di a luna
U contu di Salomone
Ci face a vita cheta
Ghjuvan Petru u pueta

Quandu chi a rima spera
E porta fede a u core
Pocu impreme a sfiera
E pò u contu di l’ore
Ancu sé u celu hé tètru
Cùn tè sim’O Ghjuvan Petru

Quandu chi a rima spenghje
A nostra fiara partuta
Ghjé u paese chi pienghje
Ogni morta accaduta
Ci canti vivi, i dulori
O Ghjuvan Petru Ristori

Quandu a rima preziosa
‘Treccia cusì belli fiori
U paese di a Riventosa
Hé fieru di i Ristori
E ci adunnisce à l’intornu
Ghjuvan Petru di Meziornu.
 
Paulu-Andria
Aostu 2004
DIANA
 
Dà l’albori di i tempi
Inlla fresca attrachjata,
Sin ‘a  li chjari mumenti
 Di una vita rinata,
U to lume o DIANA
Guida una speranza strana.

Quella di ogni Pastore,
Una fede paisana,
 Impastata di l’amore
 Di una prumessa vana,
Una idea vagabonda
Chi face la vogatonda

 Inllu vaghjime ritrovu
 Di e stagione arcane  
 Nasce lu misticciu novu
Colmu di valore umanu
Ch’ abbraccianu a natura.
Una santa unione pura.

 I conosci tù, li passi
 Inlle muntagne d’argente,
Chi piugonu quì, i chjassi
 Per ghjunghje pane à la ghjente
 E tene u focu accesu,
 In ogni locu, ogni paese.

L’hai viste tù, ‘sse ribbe,
Sverdicate di veranu,
‘Ssi prati, mare di spighe
Cùn marosuli di granu,
Nati di sudore solu,
E di sennu campagnolu.

A senti tù, a puesia
Di a funtana impetrata,
Chi stancia, inlla sicchia
A più forte sciruccata,
Cava la sete cristiana
D’istatina a la ciacciana.

O Diana, tù a sai
A nostra vita, e  l’amore
D’ una terra chi ormai
Nega tutti i so pastori
E cundanna u campagnolu
À purtà sempre u dolu.

Quandi lu mare s’infiara
A l’alba di u terranniu,
Ti vecu parte o cara
E mi stò cume l’orfagnu
Chi campa senza ragione
E teme la cumpassione.

Paulu Andria FLUIXA
Veranu 2000
L'Omu-Aliva.

Eiu so alburu natu,   
L’omu-Aliva terraniu,
A la terra arradicatu
A lume di sole pagnu.
U mio sognu ghjuventù
Ha cent’anni, mille è più. 

E mio radighe memoria
Mi danu suchju di vita,
A richezza d’una storia
Da i seculi culpita,
Di sale è  neve mischjata
Di resistenza impastata. 

Cùn li mio vechji cumpagni
Lampemu tramula nova,
Querci, Suvari Castagni,
Vulemu mette a la prova
L’embiu d’una vita umana
E di spartera a cullana.   

Mà soffia da u Punente
Un ventu maestru, forte.
Un’idea arogante
A l’omacu di a morte
Chi spazza per esempiu
L’amore in ogni tempiu. 

Face cresce lu marone,
Lascia li renaghji pari,
Spula ogni tradizione
Versu li ricordi rari.
Tuttu torna marcanzia
E di l’omu a pazzia...... 

....Mà mi godu lu sciroccu
Di disertu lu tesoru;
In core di l’omu scioccu
Sciarba li palazzi in oru;
Mi scalda e m’accarrezza,
Cava a l’ogliu l’amarrezza.


    Paulu Andria FLUIXA
Inguernu 2000
Mare nostru

Mare chi Cirnu avvinghje
Eppoi segondu l’estru
Quandu rode o accarezza
Ciò chi l’omu Corsu svezza
Allarga é ancu stringhje
U travagliu di maestru

Mare turchinu à lu ventu
Chi u sole face azuru
Lisciu quante dolce seta
E chi lu sguardu accheta
Ciambottu in u sussuru
Di un sognu mai quentu.

Mare chi Cirnu alliscia
Longu à la so bianca rena
Tandu  dà é ci ripiglia
Ciò chi sempre ci assumiglia
E ch’in core nostru mena
Quandu  Corsu s’avvilisce

Mare foscu in furìa
Ch’ in u marosulu ‘ngolle
Una storia fatta à scambiu
E c’insegna un mondu bambiu
Carcu di l’antiche fole
Vestute dà puesia.

Mare chi Cirnu abbraccia
E mantene sempre a gallu
Per fà chi lu Corsu campi
Tantu di strazii é d’inciampi
Tuttu avvintu di curallu
In curona lu s’allaccia
lu mio ritrattu

Di fane lu mio ritrattu
Cume à tutti era impostu
A facciu di core sbrattu
Chi quì so venutu appostu
Cume l’altri ùn so mattu
Feraghju ritrattu tostu

I capelli sò ‘ngrisgiati
Forse un pocu à bon’ora
L’ochji sò arivigliati
E la pelle sempre mora
 Denti tutti arradicati
…quelli ch’ùn sò micca fora

A mez’a faccia lu nasu
Chi pare una muntagna
Questu quì l’aghju a casu
Vistu cume una  macagna
Mà eo ne so persuasu
Ghjé una vera cuccagna

Eiu ùn aghju barbazzale
Mà una barba à paese
A vedemi di facciale
Paru un corbu venachese
U mo visu in generale
Un teme micca l’offese

Di l’arechje ùn si ne parla
N’aghju un paghju chi figura
A vi dicu, ùn si ciarla
So pruvistu di natura
A chi ne vede a fiura
Addimette la misura

Dà dui anni, ci vole à dilla
Pigliò un pocu di pesu
Un aghju nunda di l’anguilla
A verità mi so arresu !
Ogni sera a camumilla
Chi di fumà m’hé difesu

Quì ci vulia à capìla
Chi so un bellu zitellu
Per la gente feminile
Bench’ùn sia giuvanellu
Un bellissimu fenile
Hé per sempre un ghjuvellu

L’averete ancu capita
Ancu so a facciu prestu
Ogni ghjornu di a mo vita
Ciò ch’eo facciu, facciu lestu
Eppò per falla finita
Saperete so mudestu !


 

 
Nous contacter - Réalisation du site